«اوخله‌یاتگن بخت» عنوانیده‌گی اوشبو اثر، استعدادلی شاعر «اسدالله بارز عزیزي»نینگ شعرلری تۉپلمی‌دیر. 

بارز عزیزی یاش بۉلیشیگه قره‌مه‌ی، شعرده اۉز قابلیتینی تاپگن شاعرلر سیره‌سیگه کیره‌دی. او کۉپینچه کلاسیک قالبلرده شعر یازسه هم، اونینگ شعرلری تورلی مضمونلرنی اۉز ایچیگه آله‌دی.

یقینده چاپدن چیققن «اوخله‌یاتگن بخت» ناملی اثری اېسه اونینگ تۉرت-بېش ییل جریانیده یازگن شعرلری مجموعه‌سی‌دیر. اثرده، جمعاً اۉزبېکچه 40 ته غزل، 2 ته رباعي و 2 ته تۉرتلیک، همده فارسچه 3 ته غزل و 3 ته دو بیتی یېرلشتیریلگن.

اوشبو شعرلرنینگ برچه‌سینی تیلیمیزنینگ صلاحیتلی استادلریدن بیری حرمتلی «دوکتور سید محمد عالم لبیب» جنابلری کۉریب چیقیب، توزه‌تیب، کېین اثر حقیده تقریظ یازگن.

بو کتاب، «قدیمگی خراسان نشریاتی» آرقه‌لی، 1000 تیراژده، کابل‌ده نشردن چیقدی.

اَیتیش لازم که اوشبو اثر، انگستان اۉلکه‌سی‌نینگ منچستر شهریده استقامت قیله‌یاتگن وطنداشلریمیزدن حرمتلی «محمد کریم امین»، «شفیع بېک اۉغلی» و «نجیب الله تېمور» مالي یاردمی بیلن چاپ اېتیلدی.