منگو پیدیا
اۉزبېک متنی بۉییچه اېنگ کتـّه منبع
قیمت کمپیرنینگ خزینه‌سی (اېرتک)
قیمت کمپیرنینگ خزینه‌سی
اېرتک
تیارلاوچی: محمد حسن تۉلقین
ساووق هوا، قارانغو کۉچه. فقط‌گینه یۉل چېتیده‌گی یامغیردن قالگن کۉکلمَکلرده بولوت سیلجیگنده آی شعله‌سی بیر- بیر کۉرینیب قاله‌دی. کوموش قۉرقوونی یېنگیش اوچون تېلفون چیراغینی یاقیب، اۉزیگه یاققن قۉشیقنی بلند قیلیب قۉیدی - ده، کمپیرنینگ اوییگه یېتیب بارگونچه پست آوازده خیرگاهی قیلیب کېتدی.
سېوینچ نینگ ایتگنی تۉغری چیقیبدی. قیشلاق بۉییچه فقط قیمت کمپیر نینگ حویلیسیده چیراقلر چره‌قلب یانردی. کوموش دېواردن آشیب حویلیگه کیریبدی. آمدی کېلیب، ایتگه دوچ کېلمه‌بدی. «مېنیمچه یامغیر یاغگنیگه بیرار پنه جاینی تاپیب کیریب کېتدي او، بو کۉپّک»، اۉیلبدی کوموش. یانیق چیراقلرنی کۉریب، کوموشدن قۉرقوو اریبدی. دهلیز بۉیلب ددیل یوریب، آخریده قیزیل و آق اېشیککه دوچ کېلیبدی. کوموش آق اېشیکنی آچیبدی. خانه‌ده قیمت کمپیر آپّاق ساچلرینی یاییب، آسمانگه قره‌ب خورّک آتیب اوخله‌یاتگن اېکن. او سېکین اېشیکنی یاپگنچه، قیزیل اېشیک تامان یوزلنیبدی.
قیزیل اېشیک آرتیده‌گی کیچیک خانه‌ده اېسکی کییم جوانی بار اېکن. کوموش قیدیرگنینی تاپیشگه قیینه‌لمه‌بدی. هر قریچیده یولدوزدېک تاولنه‌دیگن دُرلر بیلن بېزه‌تیلگن کۉیلک، اۉزیدن قویاشدېک شعله تره‌ته‌یاتگن اېکن - ده. کوموش الوان کۉیلک نینگ اسیری بۉلیبدی. او کۉیلککه اېندی قۉل اوزه‌تگنده تېلفونی باسیلیب، خانه‌نی موسیقه صداسی توتیبدی. کوموش بېخاس چه‌لینگن موسیقه‌دن اېمس، بلکه قۉشنی خانه اېشیگی نینگ آچیلگن آوازیدن کۉپراق قۉرقووگه توشیبدی. او موسیقه‌نی اۉچیریبدی - یو، بیراق بارگن سری یقینلشیب کېله‌یاتگن قدم تاووشینی تۉخته‌ته آلمه‌بدی. قیمت کمپیر آچیق اېشیکدن ساچلری تۉزغیگنچه، تۉغری باستیریب کېله باشلبدی. قیزه‌لاق قۉل - آیاغی قه‌لتیره‌گنچه کۉیلکنی دستکول‌سیگه جایلبدی. چیراقنی اۉچیریبدی - ده، قارانغو خانه‌ده کمپیرنی قالدیریب، تشقریگه آتیلیبدی. اۉغری قیز کمپیردن قاچیب قوتیلیبدی - یو، دروازه یانیده تورگن به‌هیبت ایتگه توتیلیبدی. جونلری حُرپه‌یگن، سۉیلاق تیشلری اوزونلیگیدن یاپیق آغزیدن هم کۉرینیب تورگن بو ایت ایریلله‌گنچه هجومگه شَیلنیبدی. کوموش قۉرقوودن دغ - دغ تیتره‌گنچه دستکول‌سیده‌گی سویکنی قیدیره باشلبدی. اما کوموش دېواردن آشه‌یاتگنده سویک توشیب قالگن اېکن. کۉپّک بیگیزدېک تیرناقلری بیلن قیزگه تشلنیبدی. کوموش کۉیلکنی قۉلیگه آلیبدی - یو، دستکول‌نی ایت نینگ باشیگه اولاقتیریبدی. باشیگه قلپاقدېک کيیلیب قالگن دستکول‌دن خلاص بۉلالمه‌گن ایت اککیلله‌گنچه قالیبدی. آرتیگه قره‌مه‌ی قاچگن کوموش لای کۉچه‌لردن اۉتیب، آچیق قالگن دېرَزه‌دن اوییگه کیریبدی. دېرَزه پرده‌لرینی توتیب، خانه چیراقلرینی یاقیبدی. غلبه‌سیدن قووانگن کوموش شاشیب - پیشیب کۉیلکنی کيیب، آینه یانیگه باریبدی. کۉیلک باشیده بیرآز کتّه و اوزون کۉرینگن بۉلسه‌ده، اما، کوموش نینگ اېگنیگه خودّی اونینگ اوچون تیکیلگندېک لاپ - لایق کېلیبدی.
«مکتبگه کيیب بارسم، قیزلر حسددن کوییشسه کېره‌ک»، – کوموش شیرین خَیاللرگه بېریلگنچه اویقوگه کېتیبدی. تانگده اونی آنه‌سی نینگ «اېرکه قیزیم، خفه بۉلمه، آته‌نگنی اذانلب وعده قیلگن کۉیله‌گینی آلیب کېلیشگه جۉنه‌تدیم. قنی اېندی تور. مکتبگه کېچ قاله‌سن»، دېگن آوازی اویغاتیبدی. کوموش آرزو قیلگن کۉیلک بارلیگینی کۉریب، کۉزگو یانیگه باریب قره‌بدی - ده، بقیریب یوباریبدی. چونکه اونینگ ساچلری بیر کېچه‌ده قاردېک آقریب کېتگن اېکن - ده. کوموش حالسیز ییقیلیبدی.
مطلبنی اۉرتاقلـَشیش: