منگو پیدیا
اۉزبېک متنی بۉییچه اېنگ کتـّه منبع
تورک عالمی بیر قۉل بۉله‌جک‌می؟
ستمگه قرشی، عدالتسیزلیککه قرشی و باسقینچیلیک و زۉره‌وانلیککه قرشی آت چاپتیریب، قیلیچ اۉینتگن و هر دایم حُریت اوچون باتمن-باتمن بلالرنی باشینگیزدن اولاقتیرگن اې قدرتلی بابالریم!
شوکتینگیز، شکوهینگیز و بویوکلیگینگیز اوصافینی یالغیزگینه کتابلر اوراغیدن انگلمه‌دیک، بلکه قالدیرگن قیمتلی میراثینگیز بو باره‌ده شهادت بېریب تورماقده. کاشغر مدنیتی، قاره‌خاني‌لر، خوارزمي‌لر، سلجوقي‌لر، عثماني‌لر، غزنوي‌لر، اېلخاني‌لر، تېموري‌لر، بابوري‌لر، صفوي‌لر، شیباني‌لر، هشترخاني‌لر، ...نینگ میراثی و اولرنینگ قدرتینی هر دایم اېسگه سالووچی تاریخي آبده‌لر و یادگارلیکلر بیرمه-بیر عظمتینگیزنی یادلب توره‌دی. زمینیمیز سیز کبی غرورلی سلطانلر، صلابتلی حکمالر و فضلالرگه اۉز بغریدن جای بېرگنینی یخشی بیله‌میز. تاغ و تاشلر، سیزنینگ دَدیل آت چاپیب اېرکینلیک و ظلمگه قرشی قیلیچ کۉتـَریب، دشمن اوستیگه نې-نې بلالرنی یاغدیرگنینگیز اوچون گواهلیک بېره‌دی. قدرتی ایله دنیانینگ کتـّه قسمیگه حکم سورگن شکوهلی پادشاهلر سیزنینگ غیرتینگیز، شهامتینگیز و اېل‌پرور و وطن‌سېورلیگینگیزدن حیرت برماغینی تیشلب، سیز ایله کوره‌ش میدانیگه چیققنده شجاعتینگیز آلدیده تیز چۉکیب، بۉی‌سۉنیشلریدن اۉزگه چاره تاپه‌آلمه‌گنلرینی کۉپ باره اۉقیگنمیز، اېشیتگنمیز.
بیراق، اې اولوغ اجدادیم و اې بویوک بابالریم!
نېگه‌دیر ایچیمنی یامان بیر تویغو چولغه‌ماقده. بو حس اۉز خنجرینی مېن اوچون یلنگلب، قـَیره‌ب، مېنی کۉندیریشگه توتینماقده. تیلیم سۉزگه بارمه‌یدی بعضاً. حقیقتنی اۉزینگیز اَیتینگ اولوغ بابالریم! تاریخ یالغان سۉزلر اېدی‌می؟ قالگن شو میراثلر بَریسی سیزنیکی اېمس‌می؟ شجاعتده شهرتینگیز چی؟ ... یاکه یخشی اولاد بیز بۉلالمه‌دیک‌می؟
سۉزلریمدن خفه بۉلمه‌نگیز اې مېنینگ کۉکره‌گی تاغ بابالریم! یوره‌گیم دردینی سۉیله‌یاتیرمېن. قنی اېدی حالیمیزنی کېلیب کۉرسنگیز!
بیز، اولوغ بابالریمیزنینگ قوتلوق قانلری وجودیمیزده قـَینه‌یدی، -دېیه ادعاده‌میز. بیز اولوغ خانلر اولادی اېکنمیز، نېگه بونده‌یین احوالده‌میز؟ قچانگه‌چه ظلم و قره‌ملیک یوکی ایله بۉینیمیز بوکیلیب یورسین؟
بعضی وقتلر، توشکونلیک غباری آستیدن باش کۉتـَریب، امید چراغینی یوره‌گیمده یاقه‌من:
تورک عالمی بیر قۉل بۉله‌جک‌می؟ باشیمیزنی قاپلب تورگن قارانغی تونلریمیز بیر کون کېلیب، بلکه، تانگ آته‌جک‌دیر. آرتده قالگن عظمت و بویوکلیککه قـَیته‌دن اېگه بۉلیش تویغوسی، بلکه شعوری خلقیمیز آنگیده ینه جانله‌نر. بیزگه بیر اویغانیش کېره‌ک‌دیر فقط، بیر اویغانیش.
اې نامی اولوغ و غیرتی یېر تیتره‌تگن اېره‌ن بابالریم!
روحینگیز ایله بیزنی عالي مقصد سَری یۉللب تورینگیز. عدالتسیزلیک و ظلمگه قرشی کوره‌شیش اوچون بېلیمیزنی محکم باغلب قۉیینگیز. حُر یشه‌ماق و حق آلیش اوچون بیزنی قۉللب تورینگیز.
امید یالقینی یوره‌کلرده سۉنمه‌ی یشنه‌سین، -دېیه تیلک بیلدیره‌من.
مطلبنی اۉرتاقلـَشیش: