منگو پیدیا
اۉزبېک متنی بۉییچه اېنگ کتـّه منبع
میمون بیلن طوطی قوش (اېرتک)
میمون بیلن طوطی قوش
اېرتک
تیارلاوچی: محمد حسن تۉلقین
بار اېکن، یۉق اېکن، آچ اېکن، تۉق اېکن، بۉری بکاوول اېکن، تولکی یساوول اېکن، قرغه قه‌قیمچی اېکن، هکّه حکیمچی اېکن، چومچوق چقیمچی اېکن. اوّلگی زمانده بیر غارده میمون باله‌لری بیلن یشر اېکن. شو غار یانیده طوطی‌قوش هم اۉز باله‌لری بیلن یشر اېکن. میمون نینگ باله‌لری بیلن طوطی‌قوش نینگ باله‌لری بیرگه اۉینر اېکنلر. میمون باله‌لریگه:
سیزلر طوطی نینگ باله‌لری بیلن اۉینشمنگلر، آوچیلر کېلیب اولرنی اوشله‌گنده، سیزنی هم اوشلب کېته‌دیلر، - دېر اېکن. شونده‌ی بۉلسه هم میمون باله‌لری بونگه قولاق سالمه‌ی، طوطی باله‌سی بیلن اۉینر اېکنلر.
کونلرنینگ بیریده آوچیلر کېلیب قالیبدی. میمون نینگ باله‌لری غارنینگ ایچیگه کیریب قاچیبدیلر. اولر طوطی بیلن اونینگ باله‌لرینی اوشلب آلیبدیلر. میمون باله‌لرینی آلیب، باشقه یاققه قاچیبدی. آوچی قۉلیده‌گی قفسده باره‌یاتگن طوطی باله‌لریگه یالغاندن اۉلیشنی بویوریبدی. طوطی باله‌لری اۉلگنده‌ی بۉلیب شلپه‌ییب یاته‌وېریبدیلر. طوطی هم شونده‌ی قیلیبدی. آوچیلر قفسده‌گی طوطیلرگه قره‌ب، اولرنی اۉلگن دېب خَیال قیلیشیبدی و اۉشه زمان قفسنی آچیب، طوطینی باله‌لری بیلن آلیب تشلشیبدی. آوچیلر اوزاقلشگنده طوطیلر اوچیب کېته‌وېریبدیلر. اولر اۉرمانگه باریب، اۉشه میمون بیلن اوچره‌شیبدیلر. هر ایکّاولری مصلحتلشیبدی. طوطی درخت نینگ باشیده، میمون تگیده یشه‌ی باشلبدیلر.
بیر کون بیر آوچی کېلیب، طوطینی اوشلش اوچون درخت تېپه‌سیگه چیقه باشلبدی. بونی سېزگن میمون آوچی نینگ کېتیدن چیقیب، آیاغینی قیتیقلبدی. آوچی توشه‌وېرمه‌گنیدن کېین اېپچیللیک بیلن مقابل‌سیگه اۉتیب آلیب، چنگل سالیبدی، کۉزینی چیقریبدی. آوچی ییقیلیب توشیبدی. طوطی‌قوش امان قالیبدی.
کونلرنینگ بیریده طوطی‌قوش آسمانده میمونلرگه قره‌ب، اوچیب کېله‌یاتگن بورگوتنی کۉریب قالیبدی. او آلدینراق اوچیب توشیب، میمونگه خبر قیلیبدی. میمون باله‌لرینی آلیب، غارگه قاچیبدی. بورگوت هېچ کیمگه زیان یېتکزه آلمه‌ی قَیتیب کېتیبدی.
منه شونده‌ی طوطی‌قوش بیلن میمون دۉستلشیب یشه‌ی باشلبدیلر.
مطلبنی اۉرتاقلـَشیش: