منگو پیدیا
اۉزبېک متنی بۉییچه اېنگ کتـّه منبع
اۉتینچی‌نینگ بختلی خاتینی (اېرتک)
اۉتینچی‌نینگ بختلی خاتینی
اېرتک
تیارلاوچی: محمد حسن تۉلقین
بیر بار اېکن، بیر یۉق اېکن، بیر پادشاه بار اېکن. بیر خاتینینی پادشاه قۉییب یوبارگن اېکن.
کونلردن بیر کونی پادشاه اۉزینی تنیتمه‌ی، شو خاتینی نینگ اوییگه کیریب باریبدی و:
- تنگری مهمان آلینگ، دېبدی. خاتین اېشیکنی آچیب:
- تنگری مهمانگه اېشیگیمیز آچیق، - دېب پادشاه‌نی کوتیب آلیبدی. پادشاه خاتینیدن:
- بو اویده یالغیز یشه‌یسیزمی؟ - دېب سۉربدی. خاتین:
- یالغیز اېمسمن، اېریم اۉتینگه کېتگن، کېلیب قالر، دېبدی. شونده پادشاه:
- شونده‌ی گۉزل عیال اۉتینچیگه خاتین بۉلیب یشه‌یسیزمی؟ تاپیلمه‌دیمی بیر بایراق آدم؟ دېبدی.
- بایراقنی باشیمگه اوره‌یمی، پادشاه نینگ هم خاتینی بۉلیب کۉرگنمن، مینگ پادشاه‌دن بیر قول، مینگ آلتیندن بیر پول یخشی، - دېبدی خاتین.
پادشاه تعجبلنیب ینه سۉربدی:
- نیمه، پادشاه نینگ خاتینی بۉلیش یامانمی؟
- اگر پادشاه نینگ خاتینی بۉلسنگ، قیرق کونده بیر کوله‌سن-او، کونده مینگ اۉلیب تیریله‌سن. اېریمگه اۉخشه‌گن غریبلر اېسه خاتینلرینی کونده مینگ کولدیریب، آیاغاینگگه تیکان کیرسه تیلی بیلن سوغیریب آلیشگه هم راضی بۉله‌دی، - دېبدی خاتین.
پادشاه، «خاتینیم مېندن اَیریلگنیدن خورسند اېکن» دېب، اۉتینچی کېلمسدناق چیقیب کېتیبدی.
شوندن کېین پادشاه اېرته‌سی کونی بیر خاتینی بیلن قالیب، باشقه خاتینلرینی مال-دنیاسی بیلن اییریب یوباریبدی. اونینگ اېرته‌سیگه اېسه اېلتگه جر اوردیریبدی: «کیمده کیم ایکّی خاتینلی بۉلسه، بیر خاتینی بیلن قالیب، ایکّینچیسینی راضی قیلیب اییریب یوبارسین، فرمان بجریلمسه، مالی پادشاه‌لیک، باشی قضالیک!» بو فرماننی اېشیتگن بایلر، وزیر و وزرالر، ملا - اېشانلر، سوداگر و بای‌بچه‌لر، قۉیینگکی، کیم ایکّی خاتینلی بۉلسه، بیریسینی قاضی - کلانلر اشتراکیده طلاق قیلیب، سېوگن خاتینلری بیلن قالیشیبدی.
مطلبنی اۉرتاقلـَشیش: