منگو پیدیا
اۉزبېک متنی بۉییچه اېنگ کتـّه منبع
آته‌نگگه قیلسنگ، باله‌نگدن قَیته‌دی (اېرتک)
آته‌نگگه قیلسنگ، باله‌نگدن قَیته‌دی
اېرتک
تیارلاوچی: محمد حسن تۉلقین
بیر بار اېکن، بیر یۉق اېکن، بیر چال بیلن کمپیر بار اېکن. اولرنینگ یالغیز‌گینه اۉغلی بار اېکن. اولر اۉغلینی آرزو - هوس بیلن اویلنتیریشیبدی. اۉغیل هم فرزند کۉریبدی. اولر ایناق یشه‌ی باشلبدیلر. نبیره آلتی یاشگه کیریبدی. چال بیلن کمپیر اېسه، جوده قریب، قۉللری قلتیره‌یدیگن بۉلیب قالیبدی. اولر طعام یېسه‌لر کاسه‌لرینی، چای ایچسه‌لر پیاله‌لرینی قۉللریده‌ی توشیریب سیندیره‌دیگن حالگه یېتیب، اویده‌گی کاسه - پیاله‌لرنی سیندیره‌وېریبدیلر.
بیر کونی کېلین اېریگه قره‌ب:
- مېن آته - آنه‌نگیز بیلن یشه‌مه‌یمن، اولر مېنینگ بوتون ایدیش - تباقلریمنی سیندیریب تشله‌یپتی، - دېبدی.
اونینگ گپیگه اېری حیران بۉلیب، خاتینیگه: - آته‌م هم، آنه‌م هم جوده قریب قالگن، اولر ایشگه یره‌مه‌یدیلر، بیزدن باشقه هېچ کیملری یۉق. مېن اولرنی قنده‌ی قیلیب اجره‌تیب قۉیه‌من، - دېبدی.
- بۉلمه‌سه، آته - آنه‌نگیزگه یاغاچدن ایدیش - تباق یه‌سه‌ب بېرینگ، اولرنی علیحده اویگه اۉتیرغیزیب قۉیینگ، - دېبدی خاتینی.
اۉغیل بونگه راضی بۉلیبدی. آته - آنه‌سینی باشقه اویگه کۉچیریبدی، بالته، تېشه و یاغاچ آلیب کېلیب، اولرگه ایدیش - تباق یه‌سه‌شگه کیریشیبدی. شو پیتده آلتی یشر اۉغیلچه‌لری کېلیب:
- دده، نیمه قیلیه‌پسیز؟ - دېب سۉره‌بدی.
- بووینگ بیلن بووه‌نگ قریب قالیشدی، اولر چینّی ایدیش - تباقلرنی سیندیریشه‌یپتی. اولرگه یاغچدن ایدیش - تباق یه‌سه‌ب بېرماقچیمن، - دېبدی دده‌سی.
آره‌دن بیر نېچه کون اۉتیبدی. چال بیلن کمپیر کۉز یاشی قیلیب، تقدیرلریگه تن بېریب یشه‌ی باشلبدیلر. اۉغلی بیلن کېلینیگه بیر آغیز هم سۉز دېمسدن، «کېکسه‌یسنگ شو اېکن - ده»، - دېب عمر کېچیره بېریبدیلر. کونلر کېتمه - کېت اۉته‌وېریبدی. بیر کونی کېلینی بیلن اۉغلی اۉز اویلریده راسه قه‌قه‌لشیب اۉتیرسه‌لر، اۉغیلچه‌لری بالته، تېشه و یاغاچنی خانه‌گه آلیب کیریب تق - توقله‌ته باشلبدی. دده‌سی بیلن آییسی اونگه قره‌ب:
- نیمه قیله‌یاتیبسن؟ - دېب سۉره‌شسه، اۉغیلچه‌سی:
- سیزلر قرییه‌پسیزلر، اېندی سیزلرگه هم یاغاچدن ایدیش - تباق قیلیب بېریب، باشقه اویگه اۉتقزیب قۉییشیم کېره‌ک، - دېبدی.
اېری یلت اېتیب خاتینیگه، خاتینی تیلینی تیشلب اېریگه قره‌ب، نیمه دېیرلرینی بیلمه‌ی قالیبدیلر. بیر وقت اۉغیلچه‌لری قره‌سه، دده‌سی هم، آییسی هم یېرگه قره‌ب اۉتیرگن میش و ایکّاولری نینگ کۉزیدن یاش آقه‌یاتگن اېمیش. شونده خاتینی اېریگه مأیوس‌گینه باقیب:
- مېنی کېچیرینگ، بیرگه کیریب آته - آنه‌میزنینگ کۉنگلینی آله‌یلیک، بوندن کېین بیرگه یشه‌یلیک، - دېبدی.
اېری هم خودّی شونی کوتیب تورگن اېکن، خاتینی بیلن بیرگه چال - کمپیرنینگ آلدیگه کیریب، عذر سۉره‌بدیلر و قیلگن ایشلریگه توبه قیلیب، کمپیر بیلن چالنی اۉزلری نینگ یانلریگه آلیب کېلیب، یاغاچ ایدیش - تباقلرینی آتیب تشلب، چینّی ایدیشلرده طعام بېریب، یخشی خدمتینی قیلیب، ایناق یشه‌ی باشلبدیلر. چال بیلن کمپیر هم ینه اۉغلی، کېلینی و نېوره‌سی بیلن خوشوقت یشب، مراد و مقصدلریگه یېتیبدی. آته‌نگگه قیلگه نینگنی اۉغلینگدن، آنه‌نگگه قیلگه نینگنی قیزینگدن کۉره‌سن دېگنی شو اېکن.
مطلبنی اۉرتاقلـَشیش: