بیر کونی پادشاه‌ قوشینی آلیب، آتگه مینیب، آو قیلیب کېلیشگه جۉنه‌ب کېتیبدی. او کېچگچه یوریبدی، هېچ آو قیله‌دیگن نرسه‌ تاپه آلمبدی. پادشاه‌ ینه‌ یۉلگه قره‌ب کېته‌وېریبدی. او کۉپ یوریبدی، کۉپ یورسه هم مۉل یوریبدی. آوی - آوده قالیب، قوشینی قۉلیگه قۉندیریب، سوو قیدیریب کېتیبدی. بیر جایگه بارسه، بیر قودوق بار اېمیش. اونینگ آلدیگه بارسه، بیر چېکّه‌سیده چکیللب سوو تامیب تورگن اېمیش، سوونینگ تگیده بیر جام تورگن اېمیش. پادشاه‌ جامده‌گی سوونی کۉریب، سویونیبدی. او جام تۉلگنده ایچه‌من، دېب اۉتیرگنده، قوش حلیگی جامنی سوو- پووی بیلن اغدریب یوباریبدی. پادشاه‌ قوش نینگ سوونی اغدریب یوبارگنینی کۉریب، جان - پانی چیقیب، نیمه‌ قیلیشینی بیلمه‌بدی، جامنی ینه‌ سوو تگیگه قۉییبدی. سوو جامگه چکیللب توشه‌وېریبدی. جام تۉله‌ی - تۉله‌ی دېگنده، حلیگی قوش ینه‌ جامنی اغدریب تشلبدی.

پادشاه‌ درغضب بۉلیب: «بو قوش مېنگه یخشیلیک قیلر دېسه‌م، چۉل و بیابانده تشنه‌لیکدن اۉلیب کېتیشیمگه راضی اېکن،» - دېب یانیدن قیلیچینی سوغوریب آلیب، قوش نینگ کلّه‌سینی شرتّه‌ اوزیب تشلبدی. پادشاه‌ حیران بۉلیب، جامنی ینه‌ چکیللب توشه‌یاتگن سوو تگیگه قۉییب: - اې‌، خدا، - دېب آسمانگه قره‌بدی. قره‌سه، تېپه‌لیکده بیر اجدرنی کۉریبدی، چکیللب تامیب تورگن سوو اۉشه‌ اجدرنینگ آغزیدن آقیب توشه‌یاتگن زهر اېکن. بونی کۉریب، پادشاه‌ هنگ - منگ بۉلیب قالیبدی. «قوشیم مېنگه یخشیلیک قیلگن اېکن. مېن بیلمسدن اونی اۉلدیریبمن. قوش مېنگه زهرنی روا کۉرمه‌گن اېکن»، - دېب اونی بې‌گناه‌ اۉلدیرگنیگه اچینیب، پُشیمان یېب، آرقه‌سیگه قَیتیب کېتگن اېکن. شو بیلن مراد - مقصدیگه یېتگن اېکن.