- بیر-بیریمیز نینگ پتیمیزنی بیر دانه‌ قالدیرمه‌ی یوله‌میز. شونده بیز یاش قوشچه‌لر بۉلیب قاله‌میز. بیر قوش نینگ اینیگه باره‌میز، اونینگ تخملرینی آلیب تشلب، جاییگه اۉتیره‌میز. آنه‌ قوش کېلیب «باله‌م» دېب بیزنی طعاملنتیره‌وېره‌دی، - دېبدی. ایکّینچی قرغه‌‌:

- میلی، - دېبدی. کېین ایکّی قرغه‌‌ بیر قوش اینیگه باریب، بیر - بیری نینگ پتلرینی یولیب، قیپ - قیزیل گۉشتگه ایلنیبدیلر. اینده‌گی تخملرنی آلیب تشلب، اۉرنیگه اۉتیریبدیلر. اۉز اینیگه کېلگن قوش ایکّینچی قوشگه:

- منه‌، باله‌لریمیز هم تخمدن چیقیبدی، - دېبدی. اولر هر خیل طعاملر کېلتیریب بېره‌وېریبدیلر. بیر نېچه‌ کوند‌ن کېین ایکّی قرغه‌‌دن استه -سېکین پت چیقه باشلبدی. شونده اولر ینه‌ بیر - بیرلری نینگ پتلرینی آلیب تشلبدیلر. بونی کۉرگن قوش «باله‌لری»گه:

- اېندی هېچ یېرده طعام قالمه‌دی. اېندی اۉزلرینگیز اۉزلرینگیزگه طعام تاپینگلر، - دېبدی. شونده اولر قوشگه قره‌ب:

- بیزلر طعام بار جاینی بیله‌میز. شو سایلیکدن باره‌وېرسنگیز، بیر باققه باره‌سیز، او یېرده هر خیل قورت - قومورسقه‌لر کۉپ، - دېبدیلر. شونده قوش ایکّینچی قوشگه:

- بیز نینگ باله‌لریمیز یاش بۉلسه هم همه‌ جاینی بیله‌دیلر - ه، - دېبدی. شوندن کېین قوشلر او یېردن هم طعام کېلتیریب بېریبدیلر. کونلر کېتیدن کونلر اۉتیبدی. بیر کونی اۉرمانده قه‌یېردن دیر اۉت چیقیبدی. اۉرمان یانه باشلبدی. شونده همه‌ قوشلر اۉزلرینی قوتقریب اوچیب کېتیبدیلر. بو ایکّی قرغه‌‌ اېسه پتسیزلیکدن اوچالمه‌ی، قیلگن ایشیدن پُشیمان بۉلیب، آلاوده جیزغنه‌ک بۉلیب کوییب قالیبدیلر.