منگو پیدیا
اۉزبېک متنی بۉییچه اېنگ کتـّه منبع
ایلان (اېرتک)
ایلان
اېرتک
تیارلاوچی: محمد حسن تۉلقین
دنیا بیرینچی مرته برپا بۉلگنده خدا هر خیل حیوانلر و آدملر‌نی یره‌تیبدی، اولرگه یېیدیگن طعاملریگچه ایتیب بېریبدی. او اېنگ کېین ایلاننی یره‌تیبدی، اونگه:
- سېن اۉزینگ محنت قیلیب اۉز رزقینگنی اۉزینگ تاپ، - دېبدی. لېکن ایلان کۉنمه‌بدی:
- مېن، - دېبدی ایلان، - محنت قیلمه‌ی یېیمن، اۉزینگ اېنگ یخشی گۉشتلرنی تاپیب بېره‌سن، - دېبدی. خدا اونگه ایتیبدی:
- بۉلمه‌سه سېن اۉزینگ باریب همه حیوان و آدملر نینگ گۉشتیدن یېب کۉر و قَیسیسی نینگ گۉشتی سېنگه یاقسه مېنگه کېلیب ایته‌سن.
ایلان باریب همه حیوانلر نینگ گۉشتیدن یېب کۉریبدی. اونگه آدمنی گۉشتی جوده یاقیب قالیبدی. آدم گۉشتی شیرین اېکنده. او خدا نینگ آلدیگه کېله‌یاتیب، آسمانده اوچیب کېله‌یاتگن قلدیرغاچنی کۉریب قالیبدی. اونینگ هم گۉشتینی یېب کۉرماقچی بۉلیبدی. لېکن قلدیرغاچ اۉز گۉشتینی یېدیرمبدی. ایلان یقینلشیب آغزینی آچگنده، تیلینی چۉقیب آلیبدی. و اوچیب کېتیبدی. ایلان تیلسیز بۉلیب قالیبدی. او خدا نینگ آلدیگه کېلیب، آدم گۉشتی شیرینلیگینی اَیتماقچی بۉلیبدی، لېکن تیلی بۉلمه‌گنیدن غولدیره‌ب ایتالمه‌بدی. خدا اېسه:
- بار بقه‌لرنی یېیه‌وېر، - دېبدی. شونده ایلان ینه غولدیره‌بدی. خدا ایلاننی دُمیدن اوشلب سووگه اولاقتیریب یوباریبدی. شوندن بېری ایلان بقه، بلیق کبی حیوانلرنی یېب تیریکچیلیک قیلر اېمیش.
قلدیرغاچ قیلگن بو یخشیلیگی اوچون آته-بابالریمیز اونی اویلریده سقلر، اونگه اویه‌چه‌لر یسر و اونگه آزار بېرمس اېکنلر.
مطلبنی اۉرتاقلـَشیش: