منگو پیدیا
اۉزبېک متنی بۉییچه اېنگ کتـّه منبع
بۉلمسه
305
نوایي‌نینگ شاه غزللریدن
دهر اېلیدین نفع اگر یۉقتور، ضرر هم بۉلمسه،
مرهم ار یۉقتور، کۉنگولگه نیشتر هم بۉلمسه.
عالم اهلیدین اگر یۉقتور جگرگون ساغري،
کاشکی یوز مینگ قدح خونِ جگر هم بۉلمسه.
مهوشي کیم بۉلمه‌غه‌ی وصلیدین اُمّیدِ حیات،
خوشتورور کیم جانغه هجریدین خطر هم بۉلمسه.
بېدلي کیم، بېخبر توشکه‌ی بیراو هجرانیغه،
نې بلادور گه-گهی اندین خبر هم بۉلمسه.
ساقیا، نېتکه‌ی مېنی اول نوع قیلسنگ مست کیم،
عقل و هوشومدین نشان بلکیم اثر هم بۉلمسه.
کیم، توزه‌ی مستانه شاهِ غازي اوصافیده صوت،
بو کۉنگول گر بۉلسه اۉز حالیده، گر هم بۉلمسه.
اې نوایي، سېن چیکرسېن آه، لېکن یخشیدور،
اول پري‌نینگ زلفی بو یېل بیرله درهم بۉلمسه.
مطلبنی اۉرتاقلـَشیش:
اۉزینگیز اوچون علیحده حساب آچیب، اۉزبېک تیلیده‌گی ایسته‌گن متنینگیزنی اوشبو سایتگه جایلشتیرینگ.