منگو پیدیا
اۉزبېک متنی بۉییچه اېنگ کتـّه منبع
علمی غاوله‌گن قاضی
178
یازووچی: محبوب الله توران
(مطایبه)
کویاو پاشه اېندی بیر بلانینگ باشینی چـَتیب قۉیه‌دی.
- اۉله‌ی اگر اۉز حقـّیمنی بیراوگه یېدیریب قۉیسم؛ قنده‌ی بۉلسه هم بو سفر گپنی بیر یاقلیق قیلمه‌سم بۉلمه‌یدی.
بیر بار، ایکـّی بار اَیتیب قۉیگنی بیلن قه‌یین آته‌سی اۉزیدن قیزیگه یېتیشگن حقنی کویاویگه بېریشگه راضی بۉلمه‌دی.
آخری، کویاو پاشه قاضی جنابلری‌نینگ یانیگه باریب، عرض و دادینی اونگه آچیقلب بېردی. زاری‌لب،
- تقصیر! اۉزینگیزدن باشقه ته‌ینچیم یۉق، مېنینگ حقـّیمنی تویه‌نینگ اېتی‌ده‌ی قیلیب یېب یورگنلرگه اۉزینگیز جزا بېلگیلـَمه‌سنگیز باشقه چاره قالمه‌دی. التماس، اۉزینگیز مېنینگ دادیمگه یېتینگ! – دېدی.
کېینگی کون، کویاو بیلن قه‌یین آته‌سی قاضی جنابلری‌نینگ حضوریگه چقیریلدیلر.
- خوش عمـَکی، اَیتینگ چی نېگه کویاوینگیزگه حق بېریشدن انکار قیلدینگیز؟ بیران-بیر دلیلینگیز بارمی؟
- اېی قاضی اکه، او اۉزیدن-اۉزی بلدیره‌واره‌دی؛ کویاوگه کیم قۉییبدی حقنی!؟
بو گپنی تینگله‌گندن کېین قاضی جنابلری‌نینگ عالملیگی قیستب یوباره‌دی:
- سیز الله‌نینگ بویروغیگه قرشیلیک قیله‌یپسیز، اولوغ اېگه‌م اۉز کلامِ پاکیده منه بونده‌ی بویورگن:
«مالکِ یومُ الدین». یعنی: «مال کویاونیکی‌دیر».
- منه اۉقیلگن مبارک آیه‌دن معلوم بۉلدی که «مال» کویاونیکی اېکن. اېندی سیز تېنگری‌نینگ بویروغیگه قرشی چیقمه‌ی، کویاوینگیزنینگ حقـّینی ادا اېتیشینگیز لازم.
قاضی جنابلری‌نینگ بونده‌ی عالمانه و حکمتلی سۉزلرینی تینگلب تورگن کویاو غروری آشیب، داودیره‌ب-تېنتیره‌ب، اۉز-اۉزیچه «اېی یشه‌وارینگ-اه»- دېب، باشینی بیر قیمیرده‌تیب قۉیدی.
مطلبنی اۉرتاقلـَشیش:
اۉزینگیز اوچون علیحده حساب آچیب، اۉزبېک تیلیده‌گی ایسته‌گن متنینگیزنی اوشبو سایتگه جایلشتیرینگ.